Ֆրանսիայում Հայաստանի դեսպանը հանդիպեց Ազգային ժողովի Ֆրանսիա-Հայաստան բարեկամության խմբի պատգամավորների հետ

21 մայիսի, 2024

Մայիսի 15-ին Ֆրանսիայում ՀՀ դեսպան Հասմիկ Տոլմաջյանը հանդիպեց Ֆրանսիայի Ազգային ժողովի Ֆրանսիա-Հայաստան բարեկամության խմբի՝ երկու տասնյակից ավելի պատգամավորների հետ։ Հանդիպմանը ներկա էին նաև Ֆրանսիայի ԱԺ փոխնախագահ Վալերի Ռաբոն, ԱԺ-ում մեծամասնություն կազմող խմբակցության նախագահ Սիլվեն Մայարը, ԱԺ բոլոր քաղաքական խմբակցությունների ներկայացուցիչները։
Դեսպան Տոլմաջյանը պատգամավորներին ներկայացրեց Հարավային Կովկասի տարածաշրջանում տեղ գտած վերջին զարգացումները, Հայաստանի առջև ծառացած անվտանգային սպառնալիքները, ինչպես նաև Լեռնային Ղարաբաղից հայ բնակչության բռնի տեղահանումից ի վեր ի հայտ եկած հումանիտար մարտահրավերները։ Այս համատեքստում, դեսպանը կարևորեց Հայաստանի համար դժվար պահին Ֆրանսիայի կողմից ցուցաբերված աներկբա աջակցությունը՝ ընդգծելով երկու երկրների միջև ռազմավարական գործընկերության ամրապանդմանն ուղղված քայլերի կարևորությունը։
Դեսպանը բարձր գնահատեց Ֆրանսիայի Ազգային ժողովի կողմից իրականացվող կարևոր գործունեությունը՝ միտված միջազգային հանրության ուշադրությունը Հայաստանի առջև ծառացած անվտանգային մարտահրավերների վրա սևեռելուն՝ այս համատեքստում կարևորելով նաև 2024թ․ մարտի 4-ին Ազգային ժողովի կողմից Լեռնային Ղարաբաղի հայ բնակչության էթնիկ զտումը դատապարտող բանաձևի ընդունումը, բարեկամության խմբի պատգամավորների պարբերական այցերը և ի նպաստ Հայաստանի իրականացված բոլոր նախաձեռնությունները։ Բարեկամության խմբի նախագահ Անն-Լորանս Պետելը ողջ խմբի անունից վերահաստատեց համերաշխությունը Հայաստանին և աջակցությունը Լեռնային Ղարաբաղից բռնի տեղահանված հայ բնակչությանը։
Հանդիպմանը հրավիրված էր նաև միջազգայնագետ Տիգրան Եգավյանը, ով ներկայացրեց աշխարհաքաղաքական և անվտանգային իրավիճակը տարածաշրջանում և պատասխանեց պատգամավորների հարցերին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր